Il-Kummissjoni von der Leyen ippreżentat il-Patt Ekoloġiku Ewropew, il-pjan direzzjonali tal-Ewropa biex issir l-ewwel kontinent newtrali għall-klima sal-2050, u biex timplimenta l-Aġenda 2030 għall-Iżvilupp Sostenibbli, 10 jiem biss mill-bidu tal-mandat tagħha. Minn dak in-nhar, l-UE aċċellerat l-azzjoni biex tnaqqas l-emissjonijiet tal-gassijiet b’effett ta’ serra, tinvesti f’teknoloġiji ekoloġiċi u tipproteġi l-ambjent naturali.
Dan minkejja l-pandemija u l-gwerra tar-Russja kontra l-Ukrajna. Tabilħaqq ħadna din l-opportunità ġenerazzjonali u rduppjajna t-tranżizzjoni ekoloġika, hekk kif qed nerġgħu nagħmlu bir-REPowerEU. Wara kollox, mhux biss is-saħħa tan-nies li jgħixu fl-UE tiddependi fuq is-saħħa tal-pjaneta tagħna, iżda s-sigurtà tal-enerġija tal-UE tiddependi wkoll fuq il-bidla massiva lejn l-enerġija rinnovabbli.
Il-Patt Ekoloġiku Ewropew
Il-Patt Ekoloġiku Ewropew huwa l-aktar pjan ta’ trasformazzjoni komprensiv fid-dinja u bis-saħħa tal-Liġi dwar il-Klima, l-Unjoni Ewropea poġġiet l-ambizzjoni tagħha tal-2050 f’liġi vinkolanti tal-UE. Bil-pakkett lesti għall-mira ta' 55%, ippreżentat mill-Kummissjoni fis-sajf tal-2021, iddeskrivejna l-passi konkreti biex niksbu l-ambizzjoni tagħna u b’NextGenerationEU għandna l-investiment. Issa wasal iż-żmien li naċċelleraw l-implimentazzjoni, permezz tal-istrumenti li ġejjin kif muri fil-vista u fit-test ta’ hawn taħt:
Lesti għall-mira ta’ 55%, inkluż l-iskambju ta’ kwoti tal-emissjonijiet, ir-regolamenti u l-miri Mekkaniżmu ta’ Aġġustament tal-Karbonju fil-Fruntieri | L-Użu ta’ fjuwils alternattivi u infrastruttura fit-trasport | It-Tassonomija tal-UE dwar attivitajiet sostenibbli | Mewġa ta’ rinnovazzjoni | L-Istrateġija għall-foresti | L-Istrateġija Mill-Għalqa sal-Platt | Tniġġis żero L-Istrateġija għal Mobilità Sostenibbli u Intelliġenti | Il-Pakkett dwar l-Ekonomija Ċirkolari | L-Istrateġija tal-Bijodiversità |
F’Marzu 2022, il-Kummissjoni ppreżentat pakkett ta’ proposti li jibni fuq ir-rkwiżiti eżistenti tal-ekodisinn biex il-prodotti sostenibbli jsiru n-norma fis-suq tal-UE. Ir-regoli ġodda jagħmlu l-prodotti aktar durabbli, aktar faċli biex jerġgħu jintużaw, jiġu mmodernizzati, jissewwew, ikunu riċiklabbli, u effiċjenti fl-użu tal-enerġija u r-riżorsi. Il-Kummissjoni ppreżentat ukoll pjanijiet biex it-tessuti jsiru aktar sostenibbli, flimkien ma’ regoli ġodda biex jiġi żgurat li l-konsumaturi jkunu infurmati aħjar dwar is-sostenibbiltà ambjentali tal-prodotti u jkunu protetti aħjar kontra l-greenwashing.
F’Marzu 2021, il-Kummissjoni ppreżentat pjan ta’ azzjoni għall-iżvilupp tas-settur organiku. Dan se jappoġġja lill-bdiewa tal-UE biex jilħqu l-mira li 25% tal-art agrikola tinġieb taħt biedja organika kif ukoll li tiżdied b’mod sinifikanti l-akkwakultura organika sal-2030. Il-pjan ta’ azzjoni jippreżenta azzjonijiet konkreti biex tingħata spinta kemm lill-konsum kif ukoll lill-produzzjoni ta’ prodotti organiċi, flimkien ma’ żieda ulterjuri fis-sostenibbiltà tas-settur.
F’Ġunju 2022, il-Kummissjoni ppreżentat żewġ liġijiet ġodda biex in-natura terġa’ lura fl-UE kollha. Il-liġi proposta dwar ir-restawr tan-natura hija pass ewlieni fil-prevenzjoni tal-agħar impatti tat-tibdil fil-klima u t-telf tal-bijodiversità billi din tiffoka fuq ir-restawr tal-artijiet mistagħdra, ix-xmajjar, il-foresti, l-artijiet bil-ħaxix, l-ekosistemi marini u l-ambjenti urbani tal-UE, u l-ispeċijiet li jospitaw.
Mykola Kharytonov, li jmexxi ċ-Ċentru Dnipro għall-Agrikoltura Organika u l-Protezzjoni Ambjentali, qed ikompli r-riċerka tiegħu dwar il-fertilizzanti mill-Katalonja fi Spanja, minħabba li jixtieq jgħin fil-bini mill-ġdid tal-Ukrajna.
B’mod parallel, ir-regoli proposti ġodda dwar il-pestiċidi kimiċi se jnaqqsu l-użu tal-pestiċidi, inaqqsu l-impronta ambjentali tas-sistema tal-ikel tal-UE, jipproteġu s-saħħa u l-benesseri taċ-ċittadini u tal-ħaddiema agrikoli u jgħinu biex jittaffa t-telf ekonomiku kkawżat minn tnaqqis fis-saħħa tal-ħamrija u mit-telf tad-dakkara kkawżat mill-pestiċidi.
Bauhaus Ewropea l-Ġdida
Il-ħtieġa għal soluzzjonijiet minn isfel għal fuq u kokreattivi għat-tibdil fil-klima hija r-raġuni għaliex il-President von der Leyen nediet il-Bauhaus Ewropea l-Ġdida fl-2020. Din hija moviment biex it-tranżizzjoni ekoloġika ssir esperjenza sostenibbli u inklużiva għaċ-ċittadini fil-ħajja tagħhom ta’ kuljum. Turi li l-Patt Ekoloġiku Ewropew huwa aktar milli jinstabu soluzzjonijiet effettivi ta’ ispirazzjoni għat-tibdil fil-klima; huwa dwar it-titjib tal-ħajja tan-nies fil-mod kif infasslu u nibnu d-djar, l-irħula u l-bliet tagħna.
Biex tipprovdi spazju pubbliku għall-komunità li qed tikber, il-Kummissjoni nediet il-Laboratorju tal-Bauhaus Ewropea l-Ġdida fir-rebbiegħa 2022 u l-Festival tal-Bauhaus Ewropea l-Ġdida fis-sajf. Il-laboratorju jappoġġja lill-komunità fl-ittestjar tal-għodod, is-soluzzjonijiet u l-miżuri ta’ politika li se jiffaċilitaw it-trasformazzjoni fil-prattika.
*Konnessjoni mill-ġdid man-natura | Il-kisba mill-ġdid tas-sens ta’ appartenenza | Nagħtu prijorità lill-postijiet u lin-nies li huma l-iktar fil-bżonn | It-tiswir ta’ ekosistema industrijali ċirkolari u l-appoġġ għall-ħsieb taċ-ċiklu tal-ħajja
Inwittu t-triq fix-xena globali
Fil-Konferenza tan-Nazzjonijiet Uniti dwar it-Tibdil fil-Klima (COP26) f’Novembru 2021, l-Unjoni Ewropea insistiet għal progress sinifikanti fl-implimentazzjoni tal-Ftehim ta’ Pariġi, filwaqt li żgurat li l-ambizzjoni globali li t-tisħin globali jiġi limitat għal 1.5°C għadha tista’ tintlaħaq. Bħala reġjun innovattiv u industrijalizzat ħafna, it-tmexxija tal-UE qed tispira lil oħrajn madwarha biex isegwuha.
F’Ġunju 2022, il-Kummissjoni ankrat sew il-kriterji ta’ sostenibbiltà fil-ftehimiet kummerċjali bilaterali tagħha. Wara rieżami tal-aspetti tal-iżvilupp sostenibbli tal-ftehimiet kummerċjali tagħna, l-UE se taħdem aktar mill-qrib mas-sħab kummerċjali tagħha biex tinforza u timplimenta kriterji ewlenin ta’ sostenibbiltà, b’mod partikolari l-Ftehim ta’ Pariġi u l-konvenzjonijiet tax-xogħol tal-Organizzazzjoni Internazzjonali tax-Xogħol. Il-Ftehim Kummerċjali bejn l-UE u New Zealand, konkluż fl-1 ta’ Lulju 2022, huwa prova bikrija ta’ din l-ambizzjoni l-ġdida. Il-Ftehim jinkludi dispożizzjonijiet tal-ogħla livell dwar il-kummerċ u s-sostenibbiltà, inklużi sanzjonijiet marbuta mar-rispett tal-Ftehim ta’ Pariġi.
F’Ġunju wkoll, fit-12-il Konferenza Ministerjali tal-Organizzazzjoni Dinjija tal-Kummerċ, l-UE għenet biex jiġi żgurat ftehim storiku biex jiġu indirizzati s-sussidji dannużi għas-sajd fid-dinja. Il-ftehim se jipprojbixxi s-sussidji għas-sajd illegali, mhux irrappurtat u mhux irregolat u għall-istokkijiet tas-sajd eċċessiv. Biex dan jiġi infurzat, aħna żvelajna l-aġenda l-ġdida tagħna dwar il-Governanza Internazzjonali tal-Oċeani.
Maria Teresa Ferres, li ġejja minn ħames ġenerazzjonijiet ta’ sajjieda Katalani, waqqfet il-kooperattiva “Sea of Women”, li tippromwovi l-impenn etiku mal-baħar u l-viżibbiltà tar-rwol tan-nisa fis-settur tas-sajd.
