Is gá an ceartas sóisialta a chur i gcroílár an aistrithe ghlais agus an aistrithe dhigitigh. Is é atá i gceist leis sin aghaidh a thabhairt ar thionchair shóisialta agus eacnamaíocha na n-aistrithe sin, agus díriú go sonrach ar na réigiúin, ar na tionscail agus ar na hoibrithe a bhfuil na dúshláin shainiúla is mó os a gcomhair.
Sin an fáth ar chruthaigh Coimisiún von der Leyen an Sásra um Aistriú Cóir, príomhuirlis an Aontais chun a chinntiú go dtarlóidh an t-aistriú ar bhealach cothrom agus lena slógfar suas le €55 bhilliún faoi 2027 chun tacaíocht spriocdhírithe a chur ar fáil.
D’ainneoin chastachtaí breise na paindéime agus chogadh na Rúise san Úcráin, bhí an tAontas in ann an fhostaíocht a chaomhnú. Tá sé sin ag tarlú a bhuí le meascán de sholúbthacht ghearrthéarmach agus d’fhís fhadtéarmach atá cuimsithe ag an gclár le haghaidh tacaíocht chun rioscaí dífhostaíochta a mhaolú i gcás éigeandála (SURE).
Chabhraigh SURE le fostóirí a gcuid fostaithe a choinneáil ag an obair trína dtuarastail a íoc le linn na ndianghlasálacha, agus in 2021, leanadh de phoist a chosaint faoin gclár agus, ag an am céanna, rinneadh an obair ullmhúcháin le haghaidh téarnamh eacnamaíoch láidir.
Uirlisí breise le haghaidh téarnamh eacnamaíoch ionchuimsitheach
Ionstraim théarnaimh shealadach dar luach €800 billiún is ea NextGenerationEU a chuidíonn chun leigheas a chur ar an dochar eacnamaíoch agus sóisialta láithreach atá déanta ag paindéim an choróinvíris. Tacaíonn sé le fiontair agus le forbairt gnó, neartaíonn sé córais cúraim sláinte, maoiníonn sé cláir oiliúna agus scéimeanna fostaíochta, agus cuireann sé trealamh agus ábhar scoile ar fáil dóibh siúd is mó atá i ngátar. Tá REACT-EU ar cheann de na cláir is mó faoin ionstraim nua NextGenerationEU agus is clár é a chuireann an téarnamh chun cinn ar fud an Aontais trí bhorradh a chur faoin bhfás i réigiúin bheagfhorbartha.
Bhí Státchabhair ina cuid thábhachtach de fhreagairt eacnamaíoch an Choimisiúin ar an bpaindéim freisin. Ó thús na géarchéime, d’fhormheas an Coimisiún beagnach 1,010 beart náisiúnta dár luach iomlán measta thart ar €3.2 trilliún. Cuireadh deireadh de réir a chéile leis an gCreat Sealadach COVID maidir le Státchabhair an 30 Meitheamh 2022.
Idir an dá linn, i mí na Samhna 2021, ghlac an Coimisiún teachtaireacht maidir le beartas iomaíochta atá oiriúnach do dhúshláin nua. Cuirtear béim sa teachtaireacht ar an ról tábhachtach atá ag an mbeartas iomaíochta maidir le turas na hEorpa i dtreo an téarnaimh, na n-aistrithe glasa agus digiteacha agus margadh aonair athléimneach.
Ar deireadh, geilleagar sóisialta margaidh láidir a thugann tús áite d’fholláine na ndaoine, sin é an múnla is athléimní le haghaidh domhan iarphaindéime atá spreagtha ag an teicneolaíocht. Sin an fáth ar glacadh plean gníomhaíochta Cholún Eorpach na gCeart Sóisialta i mí an Mhárta 2021. Moltar sa phlean sin na trí phríomhsprioc uaillmhianacha seo a leanas de chuid an Aontais do 2030.
Sheol grúpa saoránach i Vársá siopa ‘Pulawska 20’ chun bia, cosmaidí agus éadaí saor in aisce a bhailiú agus a sheachadadh do dhídeanaithe ón Úcráin agus dóibh siúd atá easáitithe ina dtír féin.
Is plean 5 bliana é an clár oibre scileanna don Eoraip arb é is aidhm dó cabhrú le daoine aonair agus le gnólachtaí níos mó scileanna agus scileanna níos fearr a fhorbairt, folúntais a líonadh agus lántairbhe a bhaint as an ngeilleagar níos glaise agus níos digití. Seoladh an comhshocrú i mí na Samhna 2020 agus tugann sé le chéile cuideachtaí, oibrithe, údaráis áitiúla, comhpháirtithe sóisialta, soláthraithe oiliúna agus seirbhísí fostaíochta chun na scileanna a bheidh ag teastáil in earnálacha éagsúla a shainaithint agus chun gealltanais a thabhairt oibrithe a athsciliú. Go dtí seo, tá breis agus 600 eagraíocht tar éis an comhshocrú a shíniú agus tá gealltanas tugtha acu go gcuideoidh siad chun 1.5 milliún duine a uas-sciliú.
I mí an Mheithimh 2022 ghlac an Chomhairle moltaí maidir le cuntais foghlama aonair agus micridhintiúir. Chun a chinntiú go leanfaidh an Eoraip de bheith ina foras den chéad scoth maidir leis an oideachas, tá straitéis Eorpach maidir le hollscoileanna seolta ag an gCoimisiún, straitéis a chuirfidh go mór le hiomaíochas ár gcóras ardoideachais trí chomhar trasnáisiúnta níos doimhne agus ar scála níos mó.
I mí an Mheithimh 2022, tháinig an Pharlaimint agus an Chomhairle ar chomhaontú stairiúil i ndáil leis an treoir maidir le pá íosta leordhóthanach, rud a mhol an Coimisiún i mí Dheireadh Fómhair 2020. Bhí an dlí sin ina thosaíocht ag Coimisiún von der Leyen ón tús, agus cabhróidh sé chun leordhóthanacht pá íosta a fheabhsú agus chun an rochtain atá ag oibrithe ar chosaint pá íosta ar fud an Aontais a mhéadú.
Chun oibrithe a chosaint ar na dúshláin nua a bhaineann le digitiú an tsaoil oibre, i mí na Nollag 2021 mhol an Coimisiún treoir maidir le feabhas a chur ar dhálaí oibre san obair ardáin.
Is é is aidhm don mholadh a chinntiú go dtabharfar stádas dlíthiúil fostaíochta do dhaoine a oibríonn trí ardáin saothair dhigiteacha, stádas a fhreagraíonn dá socruithe oibre iarbhír, agus a chinntiú gur féidir leo leas a bhaint as na cearta saothair agus na sochair shóisialta a bhfuil siad ina dteideal.
