Saol nua
Tá sochaí na hEorpa á hathrú de bharr phaindéim COVID-19, coinbhleachtaí idirnáisiúnta, imirce uirbeach agus déimeagrafaic atá á n-aistriú. Tá sé tábhachtach muid féin a chur in oiriúint don saol nua seo agus céimeanna a ghlacadh chun a chinntiú go mbainfidh saoránaigh agus geilleagar an Aontais tairbhe as.
Táimid ag glacadh cur chuige ilghnéitheach chun é sin a bhaint amach. Tá bearta á gcur i crích againn chun déileáil le daonra atá ag dul in aois agus imirce de pháirt amháin. Den pháirt eile, maidir le ceapadh beartais an Aontais agus todhchaí na hEorpa a mhúnlú, táimid ag dul i mbun cumarsáide go gníomhach le daoine óga agus leis an bpobal trí chéile.
Oiriúnú do dhaonra atá ag dul in aois
Tá athrú ollmhór déimeagrafach ag teacht ar an Eoraip le tamall agus tá sé go fóill ar siúl. San Aontas, an t-ionchas saoil atá ann tráth breithe, tá méadú 10 mbliana tagtha air le caoga bliain anuas. Is éacht é sin, agus léiríonn sé neart agus luach ár ngeilleagar sóisialta margaidh. Mar sin féin, tá tionchar ag an daonra atá ag dul in aois ar an tslí a mairimid, agus is gá ár múnla sóisialta agus ár mbeartais a chur in oiriúint do luas an tsaoil nua seo.
Cad é atá á dhéanamh ag an gCoimisiún mar fhreagairt?
- an Páipéar Uaine maidir le hAosú a ghlacadh go luath sa tréimhse oifige
- tús a chur le díospóireacht leathan phoiblí ar na dúshláin agus na deiseanna a bhaineann le tionchair fhadtéarmacha an aosaithe, rud a imríonn tionchar ar gach glúin. Léireofar toradh an chomhairliúcháin phoiblí sa straitéis Eorpach um chúram a chuirfear i láthair i mí Mheán Fómhair 2022
Borradh a chur faoi cheantair thuaithe
Bíonn ról gníomhach ag ceantair thuaithe in aistriú glas agus aistriú digiteach an Aontais. An tsaoirse chun dul i mbun oibre nó staidéar a dhéanamh go cianda, tá sé sin ag teacht chun cinn go gasta do go leor daoine atá ag cur fúthu san Aontas, agus leis sin tá deiseanna nua ag teacht chun cinn do theaghlaigh óga, do ghnólachtaí agus do phobail tuaithe. Ní hamháin go ndéanann nuálaíochtaí sa talmhaíocht inbhuanaithe maitheas do shláinte daoine agus don aeráid, déanann siad maitheas do shlándáil bia na hEorpa.
An méid atá á dhéanamh ag an gCoimisiún chun tacú le ceantair thuaithe
- Meitheamh 2021Seoladh an fhís fhadtéarmach
Leagtar amach an bealach i dtreo ceantair thuaithe atá láidir, nasctha agus rathúil.
- Nollaig 2021Comhshocrú um an Tuath
Oibreofar i gcomhar le muintir na bpobal tuaithe. Cuideoidh plean gníomhaíochta tuaithe comhchruthaithe chun an fhís fhadtéarmach a chur i gcrích.
- Meitheamh 2022Pleananna téarnaimh agus athléimneachta
25 phlean náisiúnta téarnaimh agus athléimneachta glactha chun tacú le ceantair thuaithe agus ceantair iargúlta le maoiniú de thart ar € 14.6 billiún, infheistíocht agus athchóirithe d’athbhunú an dúlra, do naisc idirlín ardluais agus d’iarnróid áitiúla san áireamh.
Tallann a mhealladh
Tá gá le beartas imirce dlíthiúil de chuid an Aontais a bheidh uaillmhianach agus inbhuanaithe chun an tallann atá de dhíth ar ár ngnólachtaí sna cathracha agus sna ceantair thuaithe a mhealladh. I mí Aibreáin 2022, chuir an Coimisiún i láthair an pacáiste scileanna agus tallainne. San áireamh ann tá tograí reachtacha chun feabhas a chur ar chearta oibrithe imirceacha agus chun soghluaisteacht laistigh den Aontas a éascú do chónaitheoirí fadtéarma. Seolfaidh an Coimisiún díorma tallainne de chuid an Aontais chun meaitseáil saothair le náisiúnaigh nach náisiúnaigh de chuid an Aontais iad a éascú. Tá scéim phíolótach á seoladh faoi láthair, lena ndírítear ar dhídeanaithe ón Úcráin.
Dul chun cinn maidir le himirce agus tearmann
- Meán Fómhair 2020Comhaontú nua maidir le hImirce agus Tearmann
Sa chomhshocrú nua tugtar bainistiú teorainneacha atá láidir agus cothrom le chéile le rialacha éifeachtúla daonnúla maidir le tearmann agus imirce.
- Meitheamh 2021Straitéis nua Schengen
Chuir an Coimisiún i láthair straitéis nua ar mhaithe leis an limistéar Schengen a neartú chun a chinntiú go ndéanfar teorainneacha seachtracha an Aontais a bhainistiú go héifeachtach, chun comhar póilíneachta agus comhar breithiúnach a mhéadú, chun feabhas a chur ar an ullmhacht agus an rialachas, agus chun méadú limistéar Schengen a chur i gcrích.
- Eanáir 2022Tús curtha ag Gníomhaireacht an Aontais Eorpaigh um Thearmann lena hoibríochtaí
Chuir Gníomhaireacht an Aontais Eorpaigh um Thearmann tús lena cuid oibre ag tacú leis na Ballstáit an pacáiste de dhlíthe an Aontais a chur chun feidhme, ar pacáiste é lena rialaítear an tearmann, an chosaint idirnáisiúnta agus dálaí glactha, ar a dtugtar an Comhchóras Eorpach Tearmainn (CEAS).
Theith Anastasiia Konovalova ó Odesa go Búcairist, áit a bhfuil sí ag múineadh ranganna bunscoile do pháistí ón Úcráin faoi láthair. Tá sí 30 bliain d’aois.
Cluas éisteachta a thabhairt do dhaoine óga
San aitheasc ar Staid an Aontais Eorpaigh in 2021 mhol an tUachtarán von der Leyen go ndéanfaí Bliain Óige na hEorpa de 2022. Deis atá ann don Aontas Eorpach níos mó teagmhála a dhéanamh le daoine óga agus a fháil amach faoina n-éilíonn siad agus faoin aisling atá acu don Eoraip. Tá meon óg de dhíth ar an Eoraip chun an phaindéim a shárú agus chun tús a chur le ré nua.
An méid atá á dhéanamh ag an gCoimisiún chun an óige a spreagadh
- sheol an Coimisiún tionscnamh nua ar a dtugtar ALMA (Aim, Learn, Master, Achieve) [Beartaigh, Foghlaim, Máistrigh, Gnóthaigh] in 2022 chun cuidiú leis na daoine óga is leochailí nó na daoine óga is mó atá faoi mhíbhuntáiste rochtain a fháil ar an margadh saothair
- is éard atá sa Ráthaíocht don Aos Óg a seoladh in 2020, gealltanas ó gach Ballstát a chinntiú go bhfaighidh gach duine faoi bhun 30 bliain d’aois tairiscint mhaith fostaíochta, oideachais leanúnaigh, printíseachta nó cúrsa oiliúna laistigh de 4 mhí tar éis a dhífhostaithe nó tar éis an t-oideachas a fhágáil
Tionscnaimh Eorpacha ó na saoránaigh
Tá an Tionscnamh Eorpach ó na Saoránaigh ar an bhfód le 10 mbliana, agus is deis ar leith atá ann do dhaoine iarraidh ar an gCoimisiún dlíthe nua a mholadh. Ar 1 mhilliún síniú a bheith bailithe le haghaidh tionscnaimh, cinnfidh an Coimisiún conas beart a dhéanamh. Ó lár mhí Mheán Fómhair 2021 tá 10 dtionscnamh Eorpacha nua ó na saoránaigh cláraithe ag an gCoimisiún, lena n-iarrtar gníomh ón Aontas i réimsí éagsúla, idir dhálaí oibre níos fearr in earnáil an éadaigh agus cháin ar earraí glasa agus chearta breise d’ainmhithe. Ina theannta sin, bailíodh níos mó ná 1 mhilliún síniú le 3 thionscnamh eile, ar gá do na húdaráis náisiúnta iad a fhíorú:
- Cuir deireadh le Teascadh Eití – Cuir deireadh leis an trádáil
- Sábhálaimis na beacha agus na feirmeoirí! I dtreo talmhaíocht neamhdhíobhálach do bheacha i gcomhair comhshaol folláin
- Sábháil cosmaidí neamhchruálacha – Tabhair gealltanas go mbeidh an Eoraip saor ó thástáil ar ainmhithe
Rannpháirtíocht níos mó i measc an phobail i gceapadh beartais
Conas atá an Coimisiún á dhéanamh sin?
- is féidir leis an bpobal agus leis na páirtithe leasmhara ionchur a chur ar fáil tríd an tairseach ‘Cloisimis Uait’ ó thús deireadh an phróisis ceaptha beartais
- i mí na Samhna 2021, chun an próiseas comhairliúcháin a shimpliú tuilleadh, thug an Coimisiún isteach glaonna aonair ar fhianaise, cur chuige lenar tugadh le chéile dhá chéim a bhí ann roimhe sin
- d’éirigh sé níos fusa do dhaoine faoi mhíchumas rochtain a fháil ar na comhairliúcháin
- moltar do phobal an taighde eolaíochta taighde eolaíoch ábhartha ó thús na gcomhairliúchán a chur isteach
Torthaí na for-rochtana rannpháirtíochta maidir le ceapadh beartais
Idir an 9 Bealtaine 2021 agus an 9 Bealtaine 2022 chuaigh an tAontas Eorpach i dteagmháil leis na céadta míle Eorpach nach raibh sé riamh ar intinn acu páirt a ghlacadh i gcinnteoireacht ár nAontais. Sampla ar leith den daonlathas rannpháirteach a bhí sa Chomhdháil ar Thodhchaí na hEorpa, sampla nach bhfacthas a leithéid riamh roimhe ó thaobh scála agus raon feidhme de.
Rinne níos mó ná 750,000 rannpháirtí chóir a bheith 19,000 smaoineamh a roinnt agus a phlé ar an ardán digiteach ilteangach. Thug breis agus 5 mhilliún duine cuairt ar an ardán daonlathais dhioscúrsaigh sin a ceapadh go sonrach don chomhdháil.
Chuaigh Leverne Nijman agus Leah Corsmit ó thuaisceart na hÍsiltíre go dtí an Bhruiséil ar rothar a bhuí le deontas ón gCór Dlúthpháirtíochta Eorpach. Thug siad aoiléachtaí faoin Aontas agus labhair siad le breis agus 800 duine óga chun smaointe a bhailiú faoi thodhchaí na hEorpa agus faoin todhchaí atá na daoine óga sin ag iarraidh don Eoraip.
An chéad chéim eile?
Leag an Coimisiún amach 4 shruth oibre chun freagairt ar thograí na comhdhála. Fógrófar an chéad sraith de thograí nua in aitheasc an Uachtaráin von der Leyen ar Staid an Aontais i mí Mheán Fómhair 2022. Beidh na tograí sin i measc na gcinn atá le cur san áireamh i gClár Oibre 2023 an Choimisiúin. Chun na saoránaigh a ghlac páirt sa chomhdháil a choimeád ar an eolas agus chun an móiminteam a choinneáil, eagrófar ócáid aischothaithe maidir leis an gcomhdháil i bhfómhar na bliana 2022.
